“کیسی ہیں ؟ “نرمی سموئے   مدھم لہجہ۔
“کس کے بارے میں پوچھ رہے ہو؟”محبت بھرا انداز۔”کس کے پاس بیٹھا ہوں؟”

اور   وہ کھل کے مسکرائیں”بیٹھے میرے پاس ہو،پر جب اُس کا بھی پوچھنا ہو تو میرے پاس ہی بیٹھتے ہو،اب مجھے کیا پتا اِس وقت کس کے بارے میں پوچھ رہے ہو؟ “انہیں ایڈم پیارا تھا،بیٹے جیسا، یا شاید بیٹا ہی۔

“آپ کو میری محبت پہ شک ہو رہا ہے؟ ” اُس نے مسکراتی نظروں سے نورین بیگم کو دیکھا۔
“لو بھلا مجھے ہو سکتا ہے”  جیسے  چیلنج کیا ہو۔

“مسز سلیم” اور پھر  دونوں ہنس پڑے۔ کئی لمحے کمرے میں ہنسی گونجتی رہی۔  دیواریں مسکرائیں، روشنی جھلملانے لگی۔

ایڈم ہنس رہا تھااور ہنستے ہوئے وہ بنا داڑھی کے بھی جاذب لگتا تھا۔ دل موہ لینے والا۔کچھ دیر بعد وہ چپ ہوا، گہری سانس لی اور نظریں کھڑکی پر جمائیں تو نورین بیگم کی ہنسی بھی مدھم مسکراہٹ میں ڈھل گئی۔ اِسے دیکھتے جانے کیوں اب طمانیت کا احساس ہوتا تھا۔

وہ راحت دیتا تھا۔ان کو اِس عمر میں سکون کی ضرورت تھی۔ بوڑھےانسان کو وہ شخص ہمیشہ اچھا  لگتا ہے۔ جس سے اُسے بڑھاپے میں راحت ملتی ہے۔

وہ دیتا تھا۔وہ اچھا تھا۔ کم اِز کم  اِنہیں لگتا تھا۔ 
“اچھا چلو بتا ہی دیتی ہوں، میں ٹھیک ہوں بس بخار ہے وہ بھی صبح تک ٹھیک ہو جائےگا””ہمم۔۔۔اچھی بات ہے”اب وہ اپنا دائیں ہاتھ کو دیکھ رہاتھا۔ جیسے کچھ ڈھونڈ رہا ہو۔ (ہاتھ میں کیا خاص تھا،لکیریں اور بس)۔

“کیا بات ہے، ایڈم؟” فکر مند ی سے  زرا  آگے کو ہوتے اُس کے کندھے پر ہاتھ رکھا۔ ایڈم خاموش رہا، اس کی خاموشی اُنہیں چبھی تھی۔
“مسز فلپ آئیں تھیں؟” اُس نے نورین بیگم کا ہاتھ پکڑ کر اپنے ہاتھ میں لیا۔ اُنہوں  نے گہرا سانس لیا۔ جیسے یہ روز کا مسئلہ بن گیا ہو۔ مگر فکر بس سارہ کی تھی۔
“ہاں” سر ہلاتے ہوئے پیچھے کو ٹیک لگائی۔ ہاتھ ابھی بھی ایڈم کے ہاتھ میں تھا۔

“سارہ نے کیا کہا؟” وہ جیسے مسز فلپ کی توقعات سے واقف تھا۔
“کچھ نہیں۔  پر وہ دُکھی ہے۔  چھپانے کی کوشش کی اُس نے لیکن سارہ بھول جاتی ہے کہ میں  اُس کی ماں ہوں۔” وہ رکیں ”  ایڈم۔۔۔۔وہ مضبوط نہیں ہے، مضمحل ہے،” 

دفعتاً نورین بیگم کی آنکھیں  چمکیں، وہ  بے ساختہ آگے کو ہوئیں تھیں۔ ایڈم نے تعجب سے اُنہیں دیکھا،  ہاتھ ابھی بھی اُس نے تھام رکھا تھا۔ جیسے ضعیف ہاتھوں کی محبت بھری حدت اسے عزیز تھی۔

“اُسے سوچنا چاہئے ایڈم،یہاں سے زندگی وہاں اچھی ہو گی،اگر تم لوگ اپنا سب کچھ بیچ باچ بھی دو۔ پھر بھی رشیا میں گھر بنانا مشکل ہو گا اور اگر وہاں جاؤ تو زیادہ نہیں پر ایسی

زندگی نہیں ہو گی بلکہ وہاں کم از کم اپنا گھر ہو گا۔ کوئی کنٹریکٹ نہیں ہو گا،کوئی نکانے والا نہیں ہوگا،اگر رینٹڈ بھی گھر ہوا تو بھی آسان ہے یہاں کی نسبت وہاں رہنا۔ میں اُسے بہت بار سمجھا چکی ہوں لیکن وہ نہیں سنتی۔

کیوں نا اس بار تم بات کرکے دیکھو، ہو سکتا ہے مان جائے”وہ جو بھرپور توجہ سے بات سن رہا تھا۔آخری بات پر آہستگی سے اُن کا ہاتھ چھوڑتےسیدھا ہو گیا جیسے کچھ

غیر معمولی سن لیا ہو۔ وہ چپ ہواتھا۔ بلکل چپ۔ کمرے میں چند پل تو خاموشی ہی رہی جیسے ہر شے جاننا چاہتی ہو کہ ایڈم کیا جواب دے گا۔لیکن نہیں ، وہ نہیں بولا۔
“ایڈم میں نے کچھ کہا ہے،سن رہے ہو؟”

“آپ جانتی ہیں وہ سب کچھ  کر سکتی ہے لیکن وہ نہیں جو میں کہوں گا،اس لیے اِس سے بہتر ہے وہ اپنا فیصلہ خود کرے۔میں ساتھ ہوں گا لیکن ساتھ کھڑا نہیں ہوں گا۔

کچھ کہوں گا نہیں۔ بس وہ  فیصلہ کرے”

“پر ایڈم کوشش میں کیا حرج ہے؟ بات کر کے دیکھ لو ہو سکتا ہے مان جائے”انہوں نے زوردیتے کسی اُمید سے کہا۔
“اوراگر نا مانی تو،آپ جانتی ہیں حالات مشکل ہو جائیں گے،جو کہ پہلے ہی مشکل ہیں۔ جبکہ مجھے یقین ہے وہ نہیں مانے گی، میری تو بلکل نہیں ” یاسیت سے کہتے وہ اُٹھ کھڑا ہوا اور  کھڑکی کی جانب بڑھا۔ پردے اُٹھے ہوئے تھے ۔  باہر موسم کافی سرد تھا۔ سامنے والے گھر کی کھڑکی میں سے دو بچے نظر آرہے تھے۔

“وہ گھر جلدی خالی کروانا چاہتی ہے۔ راحیل مجھے لے جائے گا لیکن اِن کو نہیں۔ اِس لیے سارہ کو مان جانا چاہیے۔”

وہ ان کو سن رہا تھا مگر نظریں اُن بچوں پر جمی تھیں۔لڑکی اپنا کوئی کھلونا دوسرے بچے کو دے رہی تھی۔

“سارہ  کوسمجھنا چاہئے، اُن کا یہاں سے جانا، اُنہی کے لیے بہتر ہوگا۔پھر اپنے وطن جانے میں کیا قباحت؟”
بچے نے غلطی سے وہ کھلونا گِرا دیا تھا۔ایڈم نے آنکھیں چھوٹی کیں۔ شفاف چہرے پر چاند کی چاندی بکھری تھی۔  کالی آنکھوں میں صرف گرتی ہوئی برف نظر آرہی تھی

۔جبکہ اُس کی آنکھوں کا منظر کچھ اور تھا۔

“کم از کم اور کچھ نا سہی حالات ہی بہتر ہو جائیں گے،بعض دفعہ اپنے ملک میں ہی جانا بہتری ہوتی ہے”
 بچی نے حیرت سے بچے کو دیکھا اور رونا شروع ہوئی۔اونچی آواز میں،لڑکے نے کانوں پر ہاتھ رکھا تھا۔ایڈم اُداسی سے مسکرایا۔
“وہاں سارہ گھر بسا لے گی۔ اپنا گھر۔۔۔۔۔۔۔۔۔۔ ” 

کمرے میں   شاید اُس بچے کی ماں داخل ہوئی تھی بچے کو روتے دیکھ گلے لگایا۔جیسے تلافی کر رہی ہو۔سنبھال رہی ہو۔
“محمد کا خواب ہے وہاں جانا وہ بھی خوش ہو جائے گا، طبیعت بھی بہتر ہوجائے گی”

اب وہ دونوں کو سمجھا رہی تھی ۔صلح کروا رہی تھی۔ محبت سے،  پیار سے، آرام سے۔ جیسے اگر اب غلطی کی تو سب کچھ بکھر جائے گا۔
“سن رہے ہو؟”  انہیں جھنجھلاہٹ ہوئی،ایڈم  کی عدم دلچسپی ظاہر کرنے پر۔ حالانکہ وہ کبھی اِن سب کے معاملے میں عدم دلچسپی ظاہر نہیں کرتا تھا۔

“آپ ٹھیک کہتیں ہیں، مگر میرا آپشن ٹھیک نہیں” اُس نے آنکھیں بند کر کے کھولیں۔ سارہ سے بات وہ نہیں کر سکتا تھا۔بات بنتے ہوئے بھی بگڑ جانی تھی۔
“اگر مان گئ پھر؟”بات پھر سے شروع ہو رہی تھی۔جبکہ ایڈم یہ بات اب یہیں ختم کرنا چاہتا تھا۔

“چھوڑیں یہ باتیں، یہ بتائیں اب کتنا ٹائم دیا ہے؟ ” وہ  واپس اُن کو دیکھنے لگا تھا۔