Al-Khannas By Rija and Rida | Complete Novel00265 Download Available

: الخنّاس ایک سنسنی خیز اردو ناول ہے جو راز، جرم، انصاف اور انسانی نفسیات کے گرد گھومتا ہے۔ ہر کردار اپنے اندر ایک الگ کہانی، ایک پوشیدہ حقیقت اور ایک ایسے امتحان کو سموئے ہوئے ہے جو اسے غیر متوقع موڑوں تک لے جاتا ہے۔ سسپنس، جذبات اور گہرے معنوں سے بھرپور یہ داستان قاری کو آغاز سے اختتام تک اپنے سحر میں جکڑے رکھتی ہے۔

اس نے گاڑی کا دروازہ کھولا، گاڑی سے اترا اور اپنے کوٹ کے بٹن کھول کر اسے گاڑی میں ڈال کر دروازہ بند کر دیا۔

سامنے وین سے بھی دو آدمی باہر آئے۔

ایک لمبا تھا اور دوسرا درمیانے قد کا۔ لمبے والے کے ہاتھ میں پستول تھی جبکہ دوسرے آدمی کی جیب سے چاقو کا اوپری حصّہ دیکھائی دے رہا تھا۔ دونوں کے چہرے رومال سے ڈھکے ہوئے تھے۔

ایک ہی نظر میں وہ اپنی گہری آنکھوں سے سب ذہن نشین کر چکا تھا۔

“نوجوان ہمارے راستے سے ہٹ جاؤ نہیں تو اچھا نہیں ہو گا۔”

درمیانے قد والے نے رعب دار آواز میں دھمکی دیتے ہوئے کہا پر اس پر جوں تک نہ رینگی اور وہ بدستور ہاتھوں کو پینٹ کی جیب میں ڈالے ویسے ہی کھڑا رہا۔

لمبے والے نے اپنا ہاتھ اٹھایا۔

نوجوان کی نگاہیں اس کے ہاتھ کا تعاقب کرنے لگیں۔

اس نے پستول کا رخ سامنے کی جانب کر دیا۔

وہ اپنی جگہ سے نہیں ہلا۔

نقاب پوش نے اپنی انگلی سے ٹریگر دبا دیا۔

دھماکے کی آواز پورے ہائی وے پر گونج گئی۔

پر اس بار بھی گولی فضا میں کہیں گم ہو گئی کیوں کہ وہ بجلی کی سی تیزی سے نیچے جھک چکا تھا۔

اس سے پہلے کہ سامنے والا شخص دوسری گولی چلاتا وہ پھرتی سے اٹھا اور اپنی کار کی بیک سائیڈ کی جانب دوڑا۔

نقاب پوش نے اس کے تعاقب میں دو قدم آگے بڑھائے اور گولیوں کی بونچھاڑ کر دی۔

نوجوان اپنا بچاؤ کرنے لگا۔

گولیاں ایس یو وی پر مستقل چل رہی تھیں اور ماحول کو خوفناک بنا رہی تھیں۔ ہر گولی پر ایک ہولناک آواز فضا میں سناٹے کو چیر رہی تھی، اور پھر اچانک گولیوں کی آواز بند ہو گئی۔ ہائی وے پر دوبارہ وہی سنسنی خیز خاموشی چھا گئی۔

وہ نوجوان اس خاموشی پر دوسری جانب سے گاڑی کے پیچھے سے نکلا۔

اب اس کے سامنے وہ درمیانہ قد نقاب پوش کھڑا تھا جبکہ اس کی دائیں جانب خالی پستول پکڑے دوسرا شخص۔

سامنے کھڑے شخص نے جیب سے چاقو نکالا اور پوری قوت سے نوجوان کی جانب بڑھا پر وہ ایک سائیڈ ہٹ گیا۔ اس شخص کو نوجوان پر بہت غصّہ آیا۔

وہ پلٹا۔۔ اور دوبارہ پوری شدت سے اس کی طرف بڑھا۔

جیسے ہی وہ قریب پہنچا، نوجوان نے اس کا وہ ہاتھ مضبوطی سے تھام لیا جس میں چاقو تھا اور پوری طاقت سے موڑ دیا۔ ہڈیوں کے چرچرانے کی آواز کے ساتھ چاقو اس کے ہاتھ سے چھوٹ کر زمین پر جا گرا۔ اور اس کے منہ سے  ایک دل خراش چیخ نکل کر سرد فضا میں گونجی۔ اور اس ایک لمحے کا فائدہ اٹھاتے ہوئے وہ نوجوان آگے بڑھا اور ایک لات پوری قوت سے اس سامنے کھڑے شخص کے منہ پر دے ماری۔

وہ پیچھے جاگرا کہ تبھی برابر میں کھڑا آدمی تیزی سے آیا اور اس پر پستول سے وار کرنے کی کوشش کی پر نوجوان ایک جھٹکے سے پیچھے ہو گیا اور اپنا گٹھنا اس کے منہ پر دے مارا جس سے وہ آدمی چکرا کر پیچھے ہٹ گیا۔

آہہ…” اس کی سسکی فضا میں تحلیل ہو گئی۔

“کافی عرصے سے وارم اپ نہیں کیا تھا پھر بھی دو منٹ اور بیس سیکنڈ میں دو گنڈوں کو ڈھیر کر دیا۔”

وہ نوجوان گھڑی کو دیکھتے ہوئے فاتحانہ مسکراہٹ چہرے پر سجا کر بولا۔

موقع کا فائدہ اٹھاتے ہوئے ایک شخص اٹھا اور نوجوان کے منہ پر گھونسا مارنا چاہا پر نوجوان نے اس کا ہاتھ پکڑ کر جھٹک دیا اور ساتھ ہی ایک زبردست گھونسا اس کے چہرے پر جڑ دیا۔ وہ کرہا کر پیچھے ہٹا اور آدمی کی ناک سے خون بہنے لگے۔

“آرام سے یار ابھی لگ جاتی مجھے۔”

نوجوان نے فکر مندی سے اپنی آستینوں کو جھٹکتے ہوئے کہا۔

اب اس کے سامنے دونوں زمین پر پڑے ہوئے تھے کہ تبھی ایک شخص غصّے سے چلایا،

“ہو کون تم؟ جانتے بھی ہو ہماری پہنچ کہاں تک ہے؟”

اس سوال پر نوجوان کا قہقہہ سرد رات میں عجیب سا گونج اٹھا۔ وہ بے خوفی سے اس کی طرف بڑھا۔

اسی اثنا میں پولیس گاڑی کا سائرن گونجا۔ نیلی بتیوں کی روشنی گلی کی دیواروں پر لرزنے لگی۔  دونوں نے اٹھ کر بھاگنا چاہا مگر نوجوان نے آگے بڑھ کر دونوں کو ایک ایک ٹھوکر ماری جس سے وہ لوگ واپس زمین پر گر پڑے۔

چند لمحوں بعد پولیس اہلکاروں نے انہیں قابو کر لیا۔ ہتھکڑیاں مضبوطی سے کس دی گئیں۔ اور بچے کو بھی تحویل میں لے لیا تھا۔ پولیس افسر نے آگے بڑھ کر نوجوان سے مصافحہ کیا۔

“آپ نے بہت بہادری دکھائی  زاویان صاحب۔ اگر آپ بروقت کارروائی نہ کرتے تو معاملہ بگڑ سکتا تھا۔ شکریہ۔”

دونوں مجرموں کو گاڑی میں بٹھایا جا رہا تھا۔ وہ اب بھی حیرت اور غصے کے ملے جلے تاثرات کے ساتھ نوجوان کو گھور رہے تھے۔

وہ آہستہ آہستہ ہاتھوں کو جیب میں ڈالے ان کی طرف بڑھا۔ رک کر ایک کے قریب جھکا اور پرسکون لہجے میں بولا،

“تم پوچھ رہے تھے نا۔۔ میں کون ہوں؟”

وہ سیدھا ہوا۔ آنکھوں میں کامیابی کی چمک صاف دکھائی دے رہی تھی۔

“میں اسپیشل سروس پراسیکیوٹر  زاویان ملک”

دونوں کے چہروں کا رنگ اڑ چکا تھا۔ پولیس انہیں کھینچ کر گاڑی میں بٹھا رہی تھی اور وہ سکتے کے عالم میں تھے۔ زاویان نے مسکرا کر  ہلکا سا ہاتھ ہلایا، جیسے کسی معمولی بات پر الوداع کہہ رہا ہو۔

پھر وہ اپنی گاڑی کی طرف بڑھا، دروازہ کھولا اور بیٹھنے سے پہلے اپنے کندھے پر خود ہی ہلکی سی تھپکی دی۔

“اُفف… بہت محنت کر لی اِن ہاتھوں نے آج۔ گُڈ ورک!”

ہلکی سی مسکراہٹ اس کے لبوں پر آئی، گاڑی اسٹارٹ ہوئی اور سرد رات میں ہیڈ لائٹس کی روشنی کے ساتھ وہ منظر دھیرے دھیرے خاموشی میں ڈوب گیا۔