✦✧✦⋯⋯⋯⋯⋯⋯⋯⋯⋯✦✧

“جانتی ہو اریبہ کبھی کبھی میرا دل چاہتا ہے۔ میں تمہیں نہ دیکھوں۔” حریم نے جس انداز میں کہا تھا۔ اپنے خشک ہونٹوں پر زبان پھیرتے ہوئے اس نے اپنی جلتی ہوئی آنکھیں ٹھیک سے کھول کر اس کی بات سمجھنے کی کوشش کی۔ “جس طرح میں نے تمہیں دیکھا تھا جس طرح سے میں نے ہمیشہ تمہیں دیکھنا چاہا تھا۔ تم ویسی نہ رہو تو میں تمہیں کبھی نہ دیکھوں۔” کہتے ہوئے اس کی دھیمی آواز مزید دھیمی ہوئی۔ اریبہ سن ہو کر رہ گئی۔ کئی لمحوں پر محیط خاموشی کے وقفے کے بعد اس نے بدوقت لب کھولے اور لہجہ ہموار رکھنے کی حتی الامکان کوشش کی۔ “تیمور بھی آیا ہے نا۔ تم نے دیکھا اسے۔” اس نے بات بدلی تھی۔ حریم نے لب بھینچے۔ “بہت ہینڈ سم ہو گیا ہے نا؟ کیا خیال ہے میں اس کے ساتھ اچھی تو لگوں گی؟” اسے خود کو چھپانا آگیا تھا یا پھر واقعی وہ سنبھل گئی تھی۔ “تم اس کے ساتھ کبھی بھی اچھی نہیں لگ سکتیں۔” یہ صلح کی سوچ اس کے ذہن میں ابھری اور لبوں سے کچھ اور پھسل پڑا۔ “میں نے کبھی تمہیں کسی اور کے ساتھ نہیں سوچا۔۔” “تو کوئی بات نہیں اب سوچ لو اتنا بھی مشکل نہیں ہے۔” ‘اریبہ پلیز کم از کم میرے سامنے یہ ڈھونگ مت کرو۔” وہ ملتجی لہجے میں کہہ رہی تھی۔ “ابھی بھی وقت ہے۔ سب کچھ تمہارے ہی ہاتھ میں ہے۔ بھائی بھی واپس آگئے ہیں اور میں جانتی ہوں وہ صرف تمہارے لیے واپس آئے ہیں۔” “مگر میں ایسا نہیں سمجھتی۔” وہ تیزی سے اس کی بات کاٹ کر بولی۔ “اگر وہ تمہارے پاس آ کر خود تم سے یہ بات کہیں تو کیا تب بھی یقین نہیں کرو گی۔” اس نے سوال کیا تھا۔ وہ لمحہ بھر کو چپ رہ گئی۔ “کر لوں گی۔ ” اس کی دھیمی سی آواز ابھری۔ “مگر صرف یقین ہی کر سکتی ہوں۔ اس سے زیادہ کچھ نہیں۔ تم کیا سمجھتی ہو حریم۔۔۔ میں اس انتظار میں بیٹھی ہوں کہ وہ آئے۔ مجھ سے کچھ کہے اور میں پھر سے اس کے سنگ ہو لوں۔ میری سوچ میری رائے میری مرضی کچھ نہیں۔ اس کا جب دل چاہے مجھے ٹھو کر مار کر چلا جائے اور جب دل چاہے۔ پھر سے مجھے اپنی ہمراہی کا اعزاز بخشنے چلا آئے۔ ” “اریبہ۔۔۔” نفی میں سر ہلاتے ہوئے اس نے بھیگے لہجے میں کچھ کہنا چاہا مگر اریبہ اس وقت صرف اور صرف اپنے دل کی کہنا چاہتی تھی۔ “تمہیں لگتا ہے وہ مجھے چھوڑ کر چلا گیا میں اکیلی رہ گئی۔ میرے پاس کوئی اور چارہ نہ رہا تو میں نے تیمور کا رشتہ قبول کر لیا۔ اب جب وہ واپس آگیا ہے۔ شاید اس کا موڈ بدل گیا ہے یا شاید اسے مجھ پر ترس آگیا ہے تو میں سب کچھ بھول جاؤں اور اس کے لیے تیمور کو اس طرح مسترد کر دوں جس طرح وہ مجھے کر کے گیا تھا۔” اس کا لہجہ بھرا گیا تھا۔ “فرہاد میرے ساتھ یہ سب کر سکتا تھا کیونکہ اسے یہ حق میں نے میری محبت نے ہی دیا تھا، مگر مجھے تیمور کے ساتھ ایسا کرنے کا کوئی حق نہیں ہے۔ یہ کوئی کھیل نہیں ہے جسے اپنی مرضی اپنے موڈ کے مقابل کھیلا جائے میں ایک ٹھو کر پر ہی سنبھل جانے والوں میں سے ہوں۔ مجھے اس اذیت سے بار بار مت گزارو حریم۔” منت کرتے ہوئے اس کا بوجھل لہجہ بکھر گیا۔ وہ بھیگی آنکھوں، ساکت نظروں سے اسے دیکھ رہی تھی۔ کچھ کہنے کے لیے لب کھلنے بھی نہ پائے تھے کہ کچھ ہلکی سی آہٹ پر نظر کے اٹھتے ہی وہ تعجب و تحیر میں آگئی۔ فرہاد دروازے میں کھڑا تھا۔ وہ کب آیا۔ اس نے کتنی باتیں سنیں۔ وہ الجھ کر ہی اریبہ کے چہرے کی زرد رنگت دیکھ چکی تھی۔ اسے یکایک اپنا آپ اس صورت حال میں مس فٹ لگا۔ وہ یہ بہترین وقت کسی نتیجے کی امید میں ان دونوں کو دینا چاہتی تھی اور اسی لیے اس سوچ کے ذہن میں آتے ہی اس نے کمرہ چھوڑنے میں لمحہ بھر کی بھی دیر نہیں کی۔